28 ივლისს ბათუმის შოთა რუსთაველის სახელმწიფო უნივერსიტეტის აგრარული ექსტენციის ცენტრის ბაზაზე აჭარის საჯარო სკოლის მოსწავლეების მონაწილეობით აგრარული უნარების მიმართულებით ტრენინგი ჩატარდა.

ტრენინგს უძღვებოდა ექსტენციის საერთაშორისო ექსპერტი, განათლების მეცნიერებათა დოქტორი აშშ-დან, ლიზა ლოქსმანი.

სკოლის მოსწავლეები გაეცნენ აშშ-ის აგრარული ექსტენციის მოდელში სასკოლო აქტივობების კომპონენტს. ახალგაზრდებმა სახალისო დავალებების საშუალებით ჯგუფურად იმუშავეს კონკრეტული იდეების და ინიციატივების ირგვლივ, წარმოადგინეს საკუთარი ხედვები, თუ როგორ წარმოუდგენიათ აშშ-ის სისტემის ქართულ რეალობაზე მორგება, აგრარული უნარების სკოლის გარემოში განვითარება და აგრარული პროფესიების პოპულარიზაცია.

ჯგუფურად მუშაობის დროს სკოლის მოსწავლეებს მენტორობას უწევდნენ ბსუ-ს აგრარული ფაკულტეტის სტუდენტები და აჭარის სოფლის მეურნეობის სამინისტროს სტაჟიორები.

ტრენინგი ჩატარდა „მომავლის ფერმერის“ ორგანიზებითა და აშშ-ის სოფლის მეურნეობის დეპარტამენტის (USDA) მხარდაჭერით.